Fundación Wenceslao Fernández Flórez

ASÍ INICIAMOS SETEMBRO EN VILLA FLORENTINA 

O próximo fin de semana, primeiro do mes de setembro, teremos unha dupla actividade en Villa Florentina. Dunha banda, dentro do programa de actividades das TARDES DE LECER NA FWFF, o grupo de teatro Fas-que-fas será o encargado de levar a cabo a lectura dramatizada de textos dunha das primeiras novelas de Fernández Flórez, publicada no ano 1903. Trátase de Krum Bace, texto do que xa falamos tempo atrás noutro artigo adicado á obra de WFF neste mesmo blog.

É este un relato corto, escrito cando Wenceslao contaba apenas 18 anos de idade e comezaba a facer as súas primeiras incursións no mundo xornalístico e literario, tres anos despois da morte do seu pai, Antonio Luis Fernández Lago. Nesta historia, o protagonista, un home deforme e de desagradable aspecto, está suxeito na súa vila ás mofas do pobo, mofas que se acentúan cando se descubren os sentimentos amorosos que o desditado ser profesa por unha fermosa moza. A idea do home-monstro, sensible ante a beleza e a bondade, está presente ao longo de todo o relato, o que nos fai lembrar a personaxes como o home-elefante, a Besta do popular conto, e mesmo ao propio Frankenstain.

Esta lectura terá lugar o vindeiro sábado, día 1 de setembro, por volta das sete do serán.

_________________________

TÉ CON HISTORIAS

Concha Espina

Por outra banda, o primeiro domingo do mes, como xa ven sendo habitual, temos unha cita coa nosa tertulia das cinco. Neste caso, estará dedicada á escritora Concha Espina, quen compartíu con Fernández Flórez e Pérez de Ayala o Premio Nacional de Literatura non ano 1927. Este fóralle concedido por Altar Mayor a Concha Espina; por Las siete columnas a Fernández Flórez e por Tigre Juan a Pérez de Ayala.

Altar Mayor, obra publicada en 1926, Premio Nacional de Litertura. Exemplar pertencente aos Fondos Bibliográficos de A. Montero.

Na Biblioteca de Fernández Flórez, en Villa Florentina, achamos dúas obras da escritora santanderina. Velaquí as amosamos:

 Retaguardia, obra publicada en 1937.

La esfinge maragata (1914) aparece na bilbioteca de Wenceslao dedicada pola súa autora. Por esta obra foille concedido o Preimo Fastenrath da Real Academia Española.

Sobre esta escritora e sobre algunhas das súas obras trataremos o domingo día 2, por volta das cinco da tarde.

 TARDES DE LECER NA FUNDACIÓN WENCESLAO FERNÁNDEZ FLÓREZ

Recital Literario-Musical

O pasado sábado, día 25, pechamos o mes de Agosto cunha enriquecedora actividade que combinou moi axeitadamente a intervención literaria coa musical en Villa Florentina.

Comezou coa chegada dos convidados por volta das seis, nunha tarde en que se misturaron as nubes e os claros. María Dolores Santos e o seu irmán Florencio, chegaron acompañados da súa nai e, pouco tempo despois, fixo acto de presencia a soprano coruñesa Teresa María Vázquez, con quen tamén viñeron Pilar Cabrera e Jorge Ferro, membros da Compañía Lírica de Galicia que dirixe Fernando Balboa, á que pertence Teresa María.

Despois dun breve ensaio, e xa guiados por Antonio Montero, director da Fundación e Presidente en funcións da mesma, leváronse a cabo os últimos preparativos e presentacións antes do comezo do acto, previsto para as sete do serán. Non podemos deixar sen mencionar o curioso feito de que tanto María Dolores Santos como Teresa María Vázquez se coñecesen, precisamente, o día anterior en Villa Florentina, nos ensaios previos para o desenvolvemento da xornada sabatina, o que é unha mostra de vontade fronte a un reto común que se víu compensado co éxito acadado.

O acto comezou coa presentación dos nosos convidados, presentación que foi levada a cabo por Antonio Montero. O director da Fundación aproveitou o motivo desta reunión, mistura de poesía e relato breve, para dar a coñecer un dos últimos achádegos relacionados coa produción literaria de Fernández Flórez: Ocho cuentos de relojes, unha obra que recopila relatos de Fernández Flórez, Camilo José Cela, J. C. De Luna, L. Montañés, N. Clarasó, A. D. Cañabate, J. L. Gómez Tello e F. J. Presedo, todos eles cun tema común: o tempo. Esta pequena xoia, con ilustracións de C. Perellón Cardona, foi editada por Roberto Carbonell Blasco para Omega (Suplemento de “PRECISIÓN”, Información de relojería de alta calidad), no ano 1951. Oportuno foi este día para dar a coñecer este libro, habida conta da temática presentada polo Dr. Florencio Santos, quen, na súa didáctica e amena intervención, combinou teoría literaria en relación co verso e a súa evolución, ofrecendo mostras da súa propia creación, indo sempre do máis doado cara o máis complexo. 

Varios momentos do recital musical.

Despois dunha primeira intervención puramente poética, o Dr. Santos deu paso á María Dolores Santos e a Teresa María Vázquez. As notas do piano, en harmónica compenetración coa deliciosa voz da soprano, encheron repentinamente o salón de Villa Florentina e circularon, volátiles e efémeras, por toda a casa, producindo fonda emoción entre moitos dos ouvientes reunidos nesta tarde próxima xa ao outono. Máis de trinta persoas puideron ser testemuña da maxia que envolve a que fora casa de veraneo de escritor coruñés.

A continuación, o Dr. Santos, levou a cabo a lectura dalgúns contos da súa autoría, entre eles, Paisaje con voces, un relato fantástico inspirado na Fraga de San Salvador de Cecebre. Deste xeito, fóronse intercalando literatura, música e reflexión coa intervención do público nos casos requeridos sobre a marcha. Finalmente, por mediación do director da FWFF, Sr. Montero, César Rodríguez, o administrador, fixo entrega aos participantes dun agasallo en nome da Fundación, como recordo do seu paso por esta casa, co desexo de que o mesmo se repita.

Aquí vemos, de esquerda a dereita, a Antonio Montero, Jorge Ferro, Pilar Cabrera, Teresa María Vázquez, María Dolores Santos, Tareixa Moris, Florencio Santos e César Rodríguez.

Para remate desta amena velada, os xardíns de Villa Florentina deron acobillo unha tarde-noite máis, a unha tertulia con café e biscoito que nin a ameaza dunha lonxana tronada puido evitar. Velaquí o paricular xeito de facer cultura na FWFF.

Mais non debemos esquecer que, estando como estamos, en medio dun lugar máxico, envoltos en pleno Bosque Animado, non podía deixar de actuar a meiga da fraga favorecendo un encontro cordial e ameno e participativo entre público e actuantes.

Para ler algúns dos relatos do Dr. Florencio Santos, por favor, PINCHE AQUÍ: Imagen congelada.doc  Madrid Literario.doc

TARDES DE LECER NA
FUNDACIÓN WENCESLAO FERNÁNDEZ FLÓREZ
RECITAL LITERARIO-MUSICAL

Villa Florentina recibíu non hai moito a vista do Dr. Florencio Santos, asíduo participante das Tardes de lecer na FWFF, con quen viña á súa irmá, María Dolores Santos, unha recoñecida pianista de orixe madrileña que ten dado innúmeros recitais e concertos de piano tanto en España como en Arxentina ou Portugal, acompañando a grandes figuras da lírica nacional. Na actualidade, imparte clases de Historia da Música en centros concertados de Madrid. Paralelamente, acompaña e dirixe ao grupo lírico da Casa de Aragón en Madrid e o Cuarteto Lírico.
    
O vindeiro sábado, día 25, o Dr. Santos, médico-escritor, criado entre A Coruña e Madrid, falará sobre a súa obra literaria e lerá algúns dos seus textos, como Paisaje con voces, ou o poema “Oda a la hoja de papel”. Florencio Santos, despois dunha brillante carreira no mundo da medicina, sentíu a necesidade de dar a coñecer ao público as súas composicións literarias, elexindo Villa Florentina para presentar as súas últimas creacións.

Paralelamente, terá lugar un recital musical onde intervirán a irmá do Dr. Santos, María Dolores Santos, tocando o piano e acompañando á soprano coruñesa Teresa María Vázquez, quen de nena cantou no Orfeón Herculino, sendo solista xa desde moi cedo. Estudou un ano de canto na Escola de Música da Coruña e, desde hai catro anos, é discípula do Mestre Fernando Balboa, con quen perfecciona a súa técnica. Foi solista no grupo vocal Ardosa, da Coruña, e na actualidade é membro da Asociación Lírica de Galicia. A citada Asociación nace na Coruña no ano 2005 e ten como presidente a Fernando Balboa. 

Será en Villa Florentina, por volta das sete do serán. A entrada, coma sempre, gratuíta. 

 PROGRAMA DE ACTOS

Lectura de contos e poemas de Florencio Santos.

Recital musical a cargo de María Dolores Santos (piano) e Teresa María Vázquez (soprano).

~~~
1º Poemario: Del romance al verso libre.

2º Interludio musical.
“Yo quiero a un hombre con toda el alma”, de El cabo primero. Zarzuela de Fernández Caballero.

3º Conto fantástico: “Paisaje con voces”.

4º Interludio musical.
“Pensar en él”, de Marina. Ópera de Emilio Arrieta.

5º Conto de humor: “O conto cheirento”.

6º Interludio musical.
“Visi d’arte”, de Tosca. Ópera de Giacomo Puccini.

7º Despedida de piano.
“Villanesca”, da Danza nº4 de Enrique Granados.

DE PORTERÍA A PORTERÍA

Capítulo IX

Categoría e responsabilidade

Benqueridos lectores, presentámoslles hoxe unha nova crónica futbolística do noso autor. Vexamos como incide no cronista o feito de saberse un “internacional”, lido en xornais ingleses, país que é berce do chamado “deporte rei”. Saberse coñecido nestes ambientes supón para Fernández Flórez un novo xeito de encararse co seu labor, pois a responsabilidade da súa pluma tamén se ve aumentada. O lector ha de supoñer no home uns coñecementos do fútbol que, en moitos casos, este está (ou aparenta estar) lonxe de ter, e iso, obviamente, crea tensión.

Debemos sinalar a relación existente entre esta crónica e un dos lances da novela O Sistema Pelegrín. Referímonos ao momento en que se produce o inicio do partido entre as dúas escolas ribais, cando unha das profesoras ten que dar a “patada de honor” que inaugure o encontro.

Para ler esta crónica, por favor, pinchen aquí:

Capítulo IX.doc

TARDES DE LECER NA FUNDACIÓN WENCESLAO FERNÁNDEZ FLÓREZ

Como case todo o mundo sabe, O bosque animado é unha das obras máis recoñecidas de Wencesalo Fernández Flórez. O sábado 18 de Agosto foi o día elexido en Villa Florentina para comentala na nosa Aula de Natureza ante un público moi variado, mais igualmente interesado na novela desde diferentes perspectivas. Dunha banda, por aqueles que sinten especial predilección pola obra cimeira do noso autor; doutra banda, por todos aqueles que, ademais de ler o Bosque Animado, foron quen de vivilo por ser naturais de San Salvador de Cecebre, lugar que servíu de fonte de inspiración para a creación deste relato. En calquera caso, resulta evidente que esta novela, encadrada por moitos estudosos dentro do chamado “realismo máxico” próximo ao de Merlín e familia, de Álvaro Cunqueiro, e da que se levan feito, cando menos, tres versións cinematográficas, emociona pola súa tenrura e polo seu humor, pola bondade natural e espontánea que mana dela e tamén pola humanidade que a impregna. É esta unha obra que pode ser comentada desde innúmeros puntos de vista: biolóxico, etnográfico, etnolóxico, filosófico, medioambiental e ecolóxico…

Sobre a relación existente entre as súas versións fílmicas e o texto literario tivemos ocasión de falar no Curso de Medioambiente e Literatura que tivo lugar en novembro do ano pasado. Todas estas adaptacións tiveron lugar despois da morte de Fernández Flórez, e non debe extrañarnos esta pegada cinematográfica se temos en conta que máis da metade da súa obra foi levada ao cine en vida do escritor. Fernández Flórez mantivo durante toda a súa vida unha estreita relación co cine, sendo os anos cuarenta os de maior actividade. Destacan as súas colaboracións con directores como Edgar Neville, Fernando Fernán Gómez, Rafael Gil, Antonio Román, Ignacio F. Iquino, etc.

________________________

Aproveitamos esta ocasión para lembrarlles que o vindeiro sábado, día 25 de Agosto, contaremos coa presencia do Dr. Florencio Santos, quen levará a cabo a lectura de varios contos e poemas da súa autoría. Estará acompañado neste evento, pola súa irmá María Dolores Santos, pianista, e pola soprano Teresa María Vázquez.

O noso grupo de teatro, coñecido polo nome de Fas-que-Fas (en homenaxe a unha personaxe da novela Ha entrado un ladrón, de WFF) representou na tarde de hoxe na vila de Melide, ante máis de 250 persoas -segundo a organización- a obra O home que inventou unha maneira de andar, basada no conto do mesmo título do escritor Xabier P. Docampo e adaptada ao teatro polo taller do grupo Fas-que-fas.

Na praza da vila, diante do Convento, foi instalado o escenario. Era unha tarde fresca, típica do mes de Agosto en Galicia. A organización tiña colocadas máis de 200 cadeiras na praza, cadeiras que estiveron ateigadas de xente e, aínda así, con moita parroquia de pé. En cada cadeira a Fundación deixou un folleto institucional dando conta aos presentes das orixes do grupo de teatro e da existencia da propia Fundación.

Deu comezo a obra puntualmente, xa que o aforo estaba sendo superado. Tan só temos que destacar unha incidencia no deselvolvemento da obra e que foi consecuencia do son e do vento que facía fungar os micros, non permitindo, por momentos, que se escoitase moi ben o que os actores falaban.

A pesar do efecto sonoro, mais tendo boa conta do traballo feito coa escenografía, deseño de Xosé Cobas, ilustrador do conto, o público quixo agradecer o traballo feito polo cadro de actores e pola excelente dirección, a cargo de Alicia Longueira.

Noraboa, por tanto, ao grupo Fas-que-Fas, que é capaz de conquerir uns fermosos triunfos en terras da nosa Galicia interior facendo país ou, cando menos, poñendo o noso grao de area.

ASÍ FOI… E ASÍ SERÁ: De Cecebre a Melide

Como é costume en Villa Florentina, o pasado sábado, segundo do mes de agosto, dedicamos a tarde ao mundo infantil cunha dramatización do famoso conto de Charles Perrault titulado O gato con botas ou Maese Gato. Un clásico entre os clásicos. A esta xornada estival, dominada en xeral polo bo tempo, asistiron os nenos acompañados dos seus pais, mais non só iso, senón que tamén participaron moitos adultos que tamén disfrutaron coa pintoresca versión que de tal conto fixo o grupo de teatro Fas-que-fas, da FWFF.

Como non podía ser doutro xeito, despois da interpretación, procedeuse a unha nova votación para elexir o próximo conto que ha de saír da Caixa dos Contos Favoritos. A situación que se deu é coincidente coa da anterior elección, xa que rematou producíndose un rabioso empate entre dúas famosas historias: a do mintireiro picariño Pinocho e a da fermosa Rapunzel de longos cabelos dourados. Dada esta peculiar anomalía, optamos democraticamente por dedicar o mes de Setembro a Pinocho e deixar Rapunzel para o mes de Outubro.

Para remate da xornada, rapaces e adultos compartiron un chocolate ben quentiño, o que veu moi ben porque pronto comezou a levantarse unha brisiña fresca que case pedía por unha chaqueta.

_______________________

E… tamén facemos saber a todos aqueles que estén interesados en seguir os pasos do Fas-que-fas, da FWFF, que o vindeiro xoves, día 16 de Agosto, o grupo de teatro da Fundación vai participar no programa de actos das Festas do San Roque de Melide. Isto significa que tal día 16, por volta das sete do serán, na Praza do Convento do dito Concello de Melide, o grupo de teatro Fas-que-fas, da FWFF, vai representar a adaptación do conto do escritor Xabier P. Docampo O home que inventou unha maneira de andar.

Por este motivo, a Fundación W. Fernández Flórez permanecerá pechada na tarde do xoves día 16.

Queda dito.

Visita á Fundación Wenceslao Fernández Flórez

O pasado venres, día 10 de Agosto, Antonio Varela Saavedra, Alcalde do Concello de Cambre, visitou a Fundación Wenceslao Fernández Flórez, acompañado por algúns dos membros da súa corporación, sendo recibido por Antonio Montero, Presidente en funcións e director da FWFF. O motivo desta visita tivo a ver cun proxecto de acondicionamento do aparcamento da Fundación, ampliando as súas posibilidades, así como cunha mellora das condicións en que se acha o monolito adicado ao Bosque Animado, monolito que é producto dunha sentida homenaxe que o municipio fixo ao escritor coruñés a mediados dos anos 50.

Paralelamente, Villa Florentina recibíu a vista do Dr. Florencio Santos, asíduo participante das Tardes de lecer na FWFF, quen quixo amosar a casa do escritor coruñés á súa irmá, María Dolores Santos. Ela é unha recoñecida pianista de orixe madrileña que ten dado innúmeros recitais e concertos de piano tanto en España como en Arxentina ou Portugal, acompañando a grandes figuras da lírica nacional e que, na actualidade, imparte clases de Historia da Música en centros concertados de Madrid. Paralelamente, acompaña e dirixe ao grupo lírico da Casa de Aragón en Madrid e o Cuarteto Lírico.

Despois de ver unha parte da casa e de departir nos xardíns de Villa Florentina tomando un refrixerio nesta cálida mañá de verán e disfrutando dunha grata brisa fresca baixo a sombra dos carballos, a Sra. Santos, quen veu acompañada do seu home, deu unha improvisada mostra da súa habilidade musical ante o grupo de visitantes interpretando algunhas pezas do seu amplo repertorio no piano do salón de Villa Florentina, quedando proxectado, para o momento en que o tempo o permita, un recital de piano a cargo de María Dolores Santos dentro do programa Tardes de lecer na FWFF.

Por outra banda, o vindeiro día 25, o Dr. Santos fará a presentación dalgúns contos da súa autoría, como é o caso de Paisaje con voces, inspirado no ambiente da fraga cecebresa, así como dalgúns poemas, entre os que destacamos “Oda a la hoja de papel”.

TARDES DE LECER NA FUNDACIÓN WENCESLAO FERNÁNDEZ FLÓREZ

A Caixa dos Contos Favoritos

(Ilustración de Gustave Doré)

O gato con botas

_________________________

O gato con botas foi un dos dous contos que saíron seleccionados na última votación realizada na Caixa dos Contos Favoritos. O outro, lembrámoslles, foi A Sereíña, lido o mes pasado.

Nestes momentos, o grupo de teatro Fas-que-fas, da FWFF, prepara a lectura moi dramatizada do conto de Perrault que narra as aventuras dun singular e inxenioso gato, Maese Gato, que, coa súa intelixencia chega a convertir ao seu pobre amo no Marqués de Carabás e, de aí en diante, nada máis e nada menos, que en xenro dun rei!

Cantos gatiños ha de haber na nosas parroquias aos que os seus amos non dan a oportunidade de facer tal… En todo caso, Morriña, o gato dos señores D’Abondo, ha de estar presente nesta lectura.

Será o sábado, día 11, en Villa Florentina, por volta das 7 do serán.

DE PORTERÍA A PORTERÍA

Golpe vai, golpe ven

Capítulo VIII

Velaquí presentamos unha nova crónica futbolística de Fernández Flórez, creador do vicegol: “Golpe vai, golpe ven”. Moitos somos os que nos asombramos ante a elasticidade, calidade e dureza de moitos xogadores de fútbol vendo os chimpos fantásticos que realizan en moitas ocasións na procura do balón… ou esquivando imparables patadóns dos contrincantes…

Para ler o artigo, por favor, pinche aquí: Capítulo VIII Golpe vai, golpe ven.doc