Viaxe ao mundo medieval
TARDES DE LECER NA FUNDACIÓN WENCESLAO FERNÁNDEZ FLÓREZ
Sábado 17 / 19.00h
O próximo fin de semana temos doble actividade na FWFF. Acaba de ter lugar en Betanzos a Feira Medieval, e Noia, a Coruña, Pontedeume, Pontevedra… e outras moitas vilas do noso entorno celebraron xa ou celebrarán aínda as súas propias.
Así é que nós, buscando nos catálogos da Biblioteca de Wenceslao en Cecebre, atopámonos cun exemplar que recolle as aventuras de Perceval e os contos do Santo Grial, aventuras escritas no seu momento (falamos do século XII) por Chrétien de Troyes, autor de quen poucos datos se coñecen. Os contos do Grial narran as aventuras do heroe Perceval e a súa evolución e madurez desde o momento en que, empuxado pola forza do sangue, abandoa á súa nai e chega á corte do Rei Arturo para ser armado cabaleiro.
Membros do grupo de teatro Fas-que-fas, da FWFF, darán conta da lectura dramatizada dalguns dos contos que forman parte desta obra.
Club de Lectura: LENDO CON WFF E OS SEUS CONTEMPORÁNEOS
Domingo 18 / 18.00h
E o domingo, por volta das seis, o noso club de lectura reunirase para comentar a lectura que nos ocupa: A Pantasma de Canterville e outros contos, do escritor inglés Oscar Wilde, a quen Fernández Flórez incluíu na súa Antoloxía do Humor.